Манӑҫми ятсене ҫухалмӗ чапӗ (викторина пӗтӗмлетӗвӗ)

«Манăçми ятсен çухалмĕ чапĕ» 

викторина пĕтĕмлетĕвĕ

   Чăваш наци конгресĕн вĕренӳ комитечĕ Раççей Федерацийĕнче халăхсен культура еткерлĕхĕн Çулталăкне тата Чăваш Республикинче мухтавлă  ентешсен Çулталăкне халалласа йĕркеленĕ регионсем шайĕнчи «Манăçми ятсен çухалмĕ чапĕ» викторина вĕçленчĕ. Вăйă-ăмăртăва ирттерекенсен йышĕнче Чăваш Республикин вĕренӳ тата çамрăксен политикин министерстви, Чăваш Республикин Наци библиотеки пулчĕç. Конкурса Чăваш, Тутар, Пушкăрт Республикисенче, Чĕмпĕр облаçĕнче вĕренекен 200 ытла шкул ачи, студент хастар хутшăнчĕ. Жюри пултарулăх ăмăртăвне килнĕ ĕçсене пăхса тухрĕ, хак пачĕ, тĕрĕс те тулли хуравланисене суйласа илчĕ, çĕнтерӳçĕсемпе призёрсене палăртрĕ. 

   Вăйă-ăмăртура çĕнтернисем тĕпчевлĕ-шыравлă ĕçлеме пултарнипе, чăваш халăхне, пирĕн республикăна чапа кăларнă тĕнчипех паллă çынсене лайăх пĕлнипе савăнтарчĕç.  Викторинăна хутшăннисенчен хăшĕ-пĕри А.Г. Николаев космонавта хисеплесе панă тата чысласа тунă унăн тăван ялĕнчи вырăнсене, П.Е. Егоров ача чухне мĕнле майпа Санкт-Петербурга лекнине, Н.Я. Бичурин çуралнă ял ятне, чăваш халăх поэчĕ П.П. Хусанкай «Нарспи» поэмăпа мĕнле майпа паллашма пултарнине тĕрĕсех хуравлайманни пулчĕ.

    Кăштах тавçăрса илеймесĕр тунă йăнăшсене палăртас тĕллевпе жюри тĕрĕс хуравсене пичетлес терĕ. Мухтавлă А.Г. Николаева хисеплесе панă  тата чысласа тунă унăн тăван  ялĕнчи вырăнсем çаксем: А.Г. Николаев СССР космонавт летчикĕн мемориал комплексĕ, А.Г. Николаев СССР космонавт летчик ячĕллĕ парк сад, космонавтсен аллейи, «Ракета» стела, А.Г. Николаев бюсчĕ, космонавтика музейĕ, А.Г. Николаев пӳрчĕ, А.Г. Николаев космонавт летчикĕн масар часавайĕ, вил тăпри çинчи мраморлă саркофаг (чул тупăк), Николаев урамĕ, А.Г. Николаев ячĕллĕ Шуршăл шкулĕ, Николаев урамĕнчи «Восток-3» лавкка. Н.Я. Бичурин Хусан кĕпернин Çĕрпӳ уесĕн (хальхи Шупашкар районĕн) Типнер салинче çуралнă. П.П. Хусанкай ача чухне Константин Ивановăн «Нарспи» поэмипе пĕрремĕш хут çапла паллашнă. Пĕррехинче Хусанкайсен ашшĕпе амăшĕ кÿршĕ яла туя кайнă пулнă. Вара вĕсем патне хĕрсем улах ларма пынă. Ларма хĕрсем Сетнерпе Нарспи валак патĕнче тĕл пулни çинчен юрла пуçланă. Петĕр вĕсем юрланине хăлха тăратсах итленĕ. Хĕрсем çывăрма выртсан Петĕр ăнсăртран хурăнташ хĕрĕн пуçелĕкĕ айĕнче пĕр кĕнеке кĕтессине курать. Хĕре систермесĕр кĕнекине туртса кăларать те пурте çывăрса кайсан вулама пуçлать. Кĕнеки Чĕмпĕрте 1908 çулта тухнă «Чăваш юмахĕсемпе халапĕсем» пулнă-мĕн. «Нарспи» тĕлне çитсен Петĕр тĕлĕнсе хытсах каять… Ун чухне вăл çиччĕ-саккăрсенче пулнă. К.В. Ивановăн ятне Петĕр Хусанкай нумай кайран, «Нарспие» шкулта класĕ-класĕпе валеçсе халăх умĕнче вула пуçласан тин пĕлнĕ.

     Хаклă туссем! Сире литература  вăййине хутшăннăшăн тав тăватпăр, малашне те хастар пулма лайăх кăмăл, чăтăмлăх, ăнăçу сунатпăр. Викторина çĕнтерӳçисемпе призёрĕсене диплом, хутшăннисене сертификат заявкăра кăтартнă электрон адреспа ярса паратпăр.

Викторина çĕнтерӳçисемпе призёрĕсем çаксем пулчĕç: