Çак ятпа иртрĕ Шупашкарти пĕрлештернĕ клуб тытăмне кĕрекен «Нарспи» клубри чăваш тĕррин кунне халалланă уяв каçĕ.
Чÿк уйăхĕн 24-мĕшĕнче çак клуба çÿрекен «Нарспи» халăх ансамблĕн тата «Сарпике» ташă ушкăнĕн пайташĕсем улах каçне пуçтарăнчĕç.
Чăваш хĕрупраçĕ ĕлĕк-авалтан кĕрхи вăрăм каçсем пуçлансан улах ларнă. Унта тĕрĕ тĕрленĕ, ытти ал ĕçне тунă. Вĕсен каçне илемлетме каччăсем килнĕ. Хамăр халăхăн авалхи йăлине хисеплесе «Нарспи» клубра та тĕрĕ тĕрлерĕç, юрă-ташăпа савăнчĕç.
Чăн та, чăваш тĕррине тĕрлес ăсталăх — пирĕн ĕлĕк-авалтан сыхланса юлнă пурлăх. Çак ăсталăха алла илме клуба çÿрекенсене Чăваш патшалăх культурăпа ÿнер институчĕн халăх пултарулăх кафедрин пуçлăхĕ, ЧНК президиумĕн пайташĕ Раиса Васильева пулăшрĕ. Вăл малтанах чăваш тĕрри-çĕввин вăрттăнлăхĕ çинчен каласа ăнлантарчĕ, кайран темиçе тĕп çĕвĕсене кăтартса парса вĕсене алла илме пулăшрĕ. Паллах, улах юрă-ташăсăр пулмарĕ. Чăваш Республикин тава тивĕçлĕ артисчĕ Иосиф Александров ертсе пыракан «Нарспи» халăх юррин ансамблĕ — юрăсем шăрантарса, ЧНК çамрăксемпе ĕçлекен комитет ертÿçи Алиса Лукина балетмейстер ертсе пыракан «Сарпике» ташă ушкăнĕ — ташласа уява илемлетрĕç.
«Нарспи» клуб ертÿçи, ЧНК культура комитечĕн пайташĕ, Чăваш Республикин культура тава тивĕçлĕ ĕçченĕ Лидия Константинова уяв каçĕ илемлĕ иртнĕшĕн пурне те чунтан саламларĕ. Раиса Васильевăна тĕрĕ пуянлăхне уçса пама пулăшнăшăн тав туса Шупашкарти пĕрлештернĕ клуб тытăмĕн ертÿçи Светлана Балыбердина алă пуснă тав хутне парса чысларĕ.
Зоя Яковлева, ЧНК массăллă информаци хатĕрĕсемпе ĕçлекен комитет ертÿçи.
#ЧНК #КЛУБНАРСПИ #Деньчувашскойвышивки #ЦКСЧебоксар
#КлубНарспиМБУКЦКСЧебоксары
