Кун йĕркинче виçĕ ыйту пулчĕ.
ЧНК юлашки вăхăтра ирттернĕ ĕç-хĕлпе паллашасси, «Хастар» ушкăнăн çĕнĕ ертӳçине суйласси, тата малашлăхри тӗллевсене палӑртса хăварасси.
Малтанах çамрăксем ҫавра сӗтел хушшинче пĕр-пĕринпе паллашрĕç.
ЧНК президенчӗ Валерий Клементьев яш-кĕрĕм умĕнче конгресс тĕп тĕллевне, юлашки вăхăтра туса ирттернĕ ĕç-хĕлне уçăмлатрĕ. Вăл çамрăксене конгресс йĕри-тавра пуçтарăнса хăйсен пултаруллăхне кăтартма, пархатарлă ĕçсем тума чĕнсе каларĕ.
«Хастар» ларăвне ятарласа Пенза облаҫӗнчен Олег Жемчугов, Муркаш, Канаш, Патӑръел районсенчен çамрăксем те килсе çитнӗ.
Пухăннă çамрăксем «Хастар» ушкăна ертсе пыма Елена Порфирьевӑна суйларӗҫ. Вăл çамрăксене йĕркелесе ертсе пыма хатĕррине пĕлтерчĕ. Унăн çумĕсем пулма Алексей Енейкин, Ирина Лампасова, Арина Галкина, Алена Гаврилова тата Алексей Зотиков килĕшрĕç.
Мал ĕмĕтлĕ яш-кĕрĕм конгресс ĕçне çĕнĕ варкăш илсе килессе ĕненес килет.
