Мария Горшкова Елчĕк районĕнчи Вырăскасси ялĕнче 1960 çулхи юпа уйăхĕн 16-мĕшĕнче çуралнă.
Мария мĕн пĕчĕкрен искусство тĕсĕсене пит ăнлансах кайман пулин те телевизорпаопера, балет, оперетта пăхма кăмăлланă. Шкулта вĕреннĕ вăхăтра юрă, ташă кружокĕсене çÿренĕ. Ялти шкултан ăнăçлă вĕренсе тухнă хыççăн çамрăк хĕр аслă аппăшĕсем ăс панипе Шупашкарти финанспа экономика техникумне çул тытнă. Шăпа ăна каярах искусство тĕнчине çавăтса кĕрет.1980-1984–мĕш çулсенче Мария Александровна Федор Павлов ячĕпе хисепленекен музыка училищинче вĕренет. Училище пĕтерсен Чăваш патшалăх юрăпа ташă ансамблĕнче ĕçлеме пуçлать. Пултарулăхне кура вăл эстрадăра çирĕп вырăн йышăнать. Унăн çĕпĕç юррисене пĕтĕм чăваш халăхĕ юратса итлет.
Мария Горшкова Чăваш наци конгресĕн ĕçĕ-хĕлне те хастар хутшăнатччĕ.
Шел, усал чир юратнă юрăçа вăхăтсăр халăхран туртса илчĕ…
Чăваш наци конгресĕн президенчĕ Валерий Клементьев, президиум пайташĕсем мĕн пур тăванĕсемпе, тус-юлташĕсемпе пĕрле пысăк çухатушăн чĕререн хурланнине пĕлтереççĕ.
Мария Александровна Горшковăна юлашки çула ăсатма раштав уйăхĕн 9-мĕшĕнче 8 сехетре пуçласа 9 сехетчен Республика больницин ритуал залĕнче пухăнаççĕ (Мускав проспекчĕ, 9)
